कविता सुनाउन विशाखापत्तनम गएका कविले गोर्खाल्याण्डबारे बुझाउन पऱ्यो : घटना यस्तो छ-

कालेबुङ, 31 मार्च


अघिल्लोपल्ट साहित्य अकादमीले गोवामा गरेको कार्यक्रममा यसै भनिएको थियो। यसपल्ट पनि फेरि त्यही बौद्धिक गल्ति दोहोरियो।

साहित्य अकादमीको दक्षिण र उत्तर पूर्वी भारतीय कवि सम्मेलनमामा भारतीय नेपाली कवि सुवास सोताङलाई ‘नेपालका कवि’ भनेर मञ्चमा बोलाइयो। यसपल्ट पनि कवि सोताङको कान्पारो तात्तियो।

‘मैले कविता सुनाइसकेपछि सुवास सोताङलाई सत्रका अध्यक्षता गरिरहेका एल आर स्वामीले पोएट फ्रम नेपाल भनेर कविता वाचनको निम्ति बोलाए,’ साहित्य अकादमीको निम्तोमा सोताङसितै विशाखापत्तनम पुगेका कवि अबीर खालिङले सुनाए, ‘जसको कडा शब्दमा विरोध जनाउँदै कवि सुवासले माफी माग्न लगाए। दर्शक दिर्घाबाट हामी (हरिश मोक्तान,जोगेन दर्नाल)ले पनि विरोध जनाउँदा आसामी, मणिपुरी कवि लगायत कन्नडका कविहरूले पनि साथ दिए।’

मञ्चमा उभेर सोताङले बुझाए, ‘नेपाली भाषामा बोल्ने बित्तिकै हामी नेपालका हुँदैनौं, हामी नेपाली भाषामा बोल्ने भारतीय नागरिक हौं। हो, यस्तै मञ्चहरूमा समेत पहिचानको सङ्कट भोग्नुपर्ने भएकोले हामीले छुट्टै राज्य गोर्खाल्याण्ड मागेका हौँ।’

कविता सुनाउन मञ्च चढेका सोताङले भारतीय नेपाली भाषी, उनीहरूको पहिचान सङ्कट र छुट्टै राज्यबारे बताउन पऱ्यो। उनले उद्घोषकलाई त माफी माग्न बाध्य पारेपारे देशभरिबाट आएका 24 वटा भाषाका कविताहरूलाई गोर्खाल्याण्डबारे बुझाइदिए।

‘एक जना मणिपुरी कविले त उठेर ‘गोर्खाल्याण्ड हुन्छ नै पनि’ भने,’ अबीर खालिङले भने,  ‘कवि सुवासले राम्ररी जवाब दिँदै गोवाको पञ्जीमा पनि यही परिचयसङ्कट भोगेको कुरो अघि सार्दै आफू खाँटी भारतीय भएको र नेपाल अलग्गै एउटा सार्वभौम राष्ट्र रहेको, नेपाली भाषालाई भारतीय संविधानको आठौं अनुसूचीमा अन्तर्भुक्त 1992 मा गरिएको अनि आजको कवि -भेला भारतीय कविहरूको हो, विदेशी कविहरूको भेला होइन’ भने। उनको समर्थनमा सबै कविहरूले अध्यक्ष एल आर स्वामीलाई माफी माग्न लगाए। एल आर स्वामीले ‘मेरो भूल भयो’ भनेपछि मात्र कवि सुवास सोताङले कविता पाठ गरे।’

 

सक्दो सेयर गर्नुहोस्-

फेसबुकबाट तपाईको प्रतिक्रिया

प्रतिक्रिया