स्रष्टा सङ्गमको वार्षिक साहित्यिक भेटघाटसितै फ्लाइओभर र दृष्टि लोकार्पण

खरसाङ, 11 जनवरी।


स्रष्टा सङ्गमको आयोजनामा पूर्व सिक्किमको रम्फूस्थित ई.पी. भवनमा वार्षिक साहित्यिक भेटघाट शुक्रबार सम्पन्न भयो। उक्त कार्यक्रम वरिष्ठ साहित्यकार नरबहादुर दाहालको अध्यक्षता अनि डा. एडोन रोङ्गोङको प्रमुख आतिथ्यमा सम्पन्न भएको थियो। हनोक थापा र इम्मानुएल गिफ्टले सञ्चालन गरेको कार्यक्रममा स्वागत सम्भाषण स्रष्टा सङ्गमको सभापति क्यामुना प्रधानले राखिन्। यस कार्यक्रममा स्रष्टा सङ्गमको पक्षमा तितस लेप्चाको प्रकाशन र हनोक थापाको सम्पादनमा प्रकाशित दृष्टि पत्रिकाको पनि लोकार्पण गरियो। सभाध्यक्ष नरबहादुर दाहाल, प्रमुख अतिथि डा. एडोन रोङ्गोङ, विशिष्ट अतिथिहरू डा. बीडी राई, डा. छत्र सुब्बा पावल, रेभ दयाछिरिङ लेप्चा, प्रकाशक तितस लेप्चा, सभापति क्यामुना प्रधान, रेभ पास्टर पीएन शेर्पा आदिको बाहुलीबाट दृष्टि लोकार्पण गरियो।

सम्पादकको वक्तव्यमा हनोक थापाले पत्रिकामा सबैलाई समेटने कोशिश गरिएको र यसलाई अब लगातार रुपमा प्रकाशन गर्नलाई सबैले सहयोग गर्न पर्ने बताए। पत्रिका समर्पणको प्रार्थना डा. छत्र सुब्बा पावलले गरेका थिए। यसै कार्यक्रममा भारतीय नेपाली साहित्यका स्रष्टा गहर उदासीलाई स्रष्टा सङ्गमको तर्फबाट मरणोप्रान्त सम्बर्द्धना पनि जनाइएको छ। यस अवसरमा अतिथिहरूको बाहुलीबाट खदार्पण गरेर अङ्ग वस्त्र अनि सम्बर्द्धना पत्रद्वारा सम्मानित गरियो। उक्त सम्मान गहर उदासीकी पत्नी तारमित लेप्चा र छोरी सृजना सुब्बालाई प्रदान गरियो। कार्यक्रममा गहर उदासीको जीवनी र भारतीय नेपाली साहित्यमा दिइएको योगदानमाथि डा. छत्र सुब्बा पावलले प्रकाश पारेका थिए। कार्यक्रममा गहर उदासीका कथाहरू वीरेन्जा राई र क्यमुना प्रधानले पठन गरेका थिए।

यसै कार्यक्रममा क्यामुना प्रधानकृत कथासङ्ग्रह फ्लाइओभरको पनि लोकार्पण गरियो। अतिथिहरू नरबहादुर दाहाल, डा. एडोन रोङ्गोङ, डा. बीडी राई, डा. छत्र पावल सुब्बा, प्राध्यापक मेहेरमान सुब्बा, एल्डर एसके प्रधान, रवि रोदन र कथाकारको बाहुलीबाट लोकार्पण गरियो। पुस्तक समर्पणको प्रार्थना पास्टर पिटर थापाले गरेका थिए भने स्रष्टाको परिचय इम्मानुएल गिफ्टले राखेका थिए। यस कार्यक्रममा स्वागत वक्तव्य रजनी पेघाले राखिन् भने सबैलाई स्रष्टा क्यामुना प्रधानले धन्यबाद दिइन्। कार्यक्रममा गायिकाद्वय प्रिसकिला सुनार अनि सुकमित टासोले गीत प्रस्तुत गरेका थिए। लोकार्पित कथाकृति फ्लाइओभरमाथि समीक्षात्मक टिप्पणी राख्दा प्रा. मेहेरमान सुब्बाले बाईबलवादी कथा, नारीवादी विद्रोही कथा लेखन अनि निष्कर्षमा क्यामुना प्रधान समाजवादी यथार्थवादी कथाकार भनी बताए।

कार्यक्रममा प्रमुख अतिथि डा. एडोन रोङ्गोङले संक्षिप्त टिप्पणी राखे। सभाध्यक्ष नरबहादुर दाहालले हामीले ईसाई साहित्य भन्ने छोड्नुपर्छ कारण हामी एक भएका छौं भन्दै नेपाली भाषा साहित्यमा मिशनेरीहरूको ठूलो भूमिका छ भनी बताए। उनले कथाले समाजको प्रतिबिम्ब देखाउँछ भन्दै कथाको संवाद गहकिलो हुनुपर्ने बताए। उनले स्रष्टा क्यामुना प्रधान कथा लेखनमा अघि आइसकेकी र अब नारीहरू पनि साहित्य लेखनमा अब्बल भएको बताए। स्रष्टा सङ्गमको तेस्रो सत्रमा दार्जीलिङ, खरसाङ, कालेबुङ, सिलगढी, सिक्किम, सिटोङ, डुवर्स क्षेत्रबाट आएका स्रष्टागटहरूले आफ्ना रचनाहरू पठन गरेका थिए भने दिलकुमार गुरूङ, सिमियोन सुकिता राईले गीत प्रस्तुत गरेका थिए। यस सत्रमा कवि रवि रोदनले समसामयिक साहित्य लेखन र डा. बीडी राईले ईसाई जगतमा  साहित्य लेखनको महत्त्वबारे वार्ता प्रस्तुत गरेका थिए। कार्यक्रममा पर्यवेक्षकको रूपमा उपस्थित डा. एडोन रोङगोङले पठन गरिएका रचनाहरूमाथि पर्यवेक्षकीय टिप्पणी राखेका थिए।

सक्दो सेयर गर्नुहोस्-

फेसबुकबाट तपाईको प्रतिक्रिया

प्रतिक्रिया