‘पङ्गा’  लिइरहने कङ्गा

Girl in a jacket

‘चाहिनेभन्दा ज्यादा बोल्ने’ भन्दै उनको आलोचना गर्नेको पनि कमी छैन । बलिउडमा उनको आफ्नै समूह छैन । समकक्षी हिरोइनसँग राम्रो उठबस छैन । अझै पनि उनलाई पाखा लगाउन खोज्नेको जमात् ठूलै छ । तर, कङ्गनामा डर देखिँदैन । आफूलाई लागेको कुरा निर्धक्क बोल्छिन्, जोसँग पङ्गा लिनपरे पनि । उनी पटक्कै हच्किन्नन् । उनको अब आउने फिल्मको नामै छ, ‘पङ्गा’ । क्या संयोग


बलिउडमा उनको कोही गडफादर छैनन्  । न स्टार किड नै हुन् । सम्पन्न र शिक्षित परिवारकी पनि होइनन् । न मुम्बई, दिल्लीजस्ता ठूला सहरमा हुर्कनै पाइन् । बलिउडले रुचाउने हिरोइनको रूपरेखाभित्र खास अटाउँदिनन् पनि । एक खाँटी ‘आउटसाइडर’ हुन् । उनी  कङ्गा  अर्थात् कङ्गना रनावत । क्षमताको सामु कसको के लाग्छ ? अचेल बलिउडमा सबैभन्दा चर्चा कुनै हिरोइनको हुन्छ भने कङ्गनाकै हुन्छ । अभिनय मात्र होइन, खरा अभिव्यक्तिले पनि निरन्तर मिडियामा छाइरहन्छिन् ।

झन् मर्णिकर्णिका : ‘द क्वीन अफ झाँसी’ हिट भएपछि त उनको आँट र साहस ह्वातै बढेको छ । उनलाई नरुचाउनेले यसलाई चुरीफुरी र घमण्ड पनि भन्न सक्छन् । बलिउडमा यसो भन्न थालिएको छ, ‘कङ्गनालाई मन पराउ वा घृणा गर, त्यो आफ्नो रोजाइ । तर उनलाई बेवास्ताचाहिँ गर्नै सकिन्न ।’

कलाकारका रूपमा पर्दामा पात्रलाई जीवन्तता दिन माहिर छिन् कङ्गना । उनलाई बलिउडको संस्थापनले किनारा लाउन नसकेकै त्यही अभिनय कुशलताले नै हो । पहिलो फिल्म ‘ग्याङस्टार’ बाटै उनलाई आमदर्शकले ‘मार्क’ गरेका थिए । त्यसपछि लड्दै–भिड्दै यहाँसम्म आइपुगेकी छन् । यहाँ अर्थात् चार फिल्म फेयर र तीन नेसनल अवार्ड चुमिसकेकी छन् । योभन्दा ठूलो कुराचाहिँ, उनी आफूलाई लागेको कुरा निर्धक्क भन्न सक्छिन् ।

बलिउडका धेरैले तीन खान (शाहरुख, सलमान र आमिर) सँग फिल्म खेल्न मरिहत्ते गर्छन्, करिअर चम्कने र प्रभुत्व बढ्ने लालसामा । तर कङ्गनाले सार्वजनिक रूपमै तीन खानसँग फिल्म नखेल्ने घोषणा गरिन् । कारण, ‘उनीहरूका फिल्ममा हिरोइन शो–पिस मात्र हुन्छन् । म त्यस्तो हुन चाहन्नँ ।’

वास्तवमै उनी हिरोको वरिपरि नाच्ने र रोमान्स गर्ने भूमिकामा सीमित छैनन् । फिल्ममा पुरुषभन्दा उनकै पात्र बलियो हुन्छ । मेरुदण्ड उनै हुन्छिन् । ‘तनु वेड्स मनु’, ‘क्वीन’, ‘तनु वेड्स मनु रिटर्न्स’, ‘सिमरन’ अनि अहिले ‘मर्णिकर्णिका’ । मर्णिकर्णिकामा त ठूलो लफडा पर्‍यो । सुरुमा यस फिल्ममा कलाकारका रूपमा मात्र जोडिएकी थिइन् उनी ।

सुटिङ आधाआधी भएपछि निर्देशक क्रिससँग मनमुटाव भयो । क्रिस निक्लिए, बाँकी निर्देशन कङ्गनाले आफैंले गरिन् । फिल्ममा निर्देशकको नाममा सुरुमा कङ्गनाको आउँछ, त्यसपछि माक्र त्रिसको । पटकथाकारलाई पनि हटाइन् । उनकै कारण सोनु सुद पनि फिल्मबाट बाहिरिए । त्यति बेला कङ्गनाको खुबै आलोचना भयो । अहिले फिल्म चल्यो, सबै चुप छन् ।

हिमाञ्चल प्रदेशबाट दिल्ली हुँदै मुम्बई पुग्दा कङ्गनाले अनेक हन्डर खानुपर्‍यो । पटक–पटक यौन दुर्व्यवहारको सिकार भइन् । उनले अभिनेता आदित्य पञ्चोलीलाई त खुलेरै आफूमाथि हिंसा गरेको आरोप नै लगाइन् । सुरुका दिनमा बलिउडले उनलाई खुब हेप्यो, पेल्यो । कारण यत्ति, उनको बलिउडमा आफ्नो भन्नु कोही थिएन । यी सब पन्छाउँदै आएकीले हुनुपर्छ, उनमा अथाह आक्रोश देखिन्छ । बलिउडमा चम्किरहेका सेलेब्रिटीका सन्तान उनको मुख्य तारोमा पर्छन् ।

उनले हिरोइन आलिया भट्टलाई ठाडै ‘करण जोहरको कठपुतली’ भनिदिइन् । करण जोहर ‘नेपोटिज्म’ का मुख्य मतियार भएको आरोप लगाउँछिन् । ऋतिक रोशन आफ्नो पूर्वप्रेमी भएको दाबी गरिनन् मात्र, यो विवाद अदालतसम्मै पुग्यो । अझै सल्टिएको छैन । मीटू अभियानमा उनले आफूलाई चम्काउने ‘क्वीन’ का निर्देशक विकास बहललाई समेत मुछिन् । आलिया, रणवीर कपुर र रनभीर सिंहलाई
‘गैरजिम्मेवार नागरिक’ को आरोप लगाइन् । पुलवामा आक्रमणपछि पाकिस्तानमा हिन्दी फिल्म प्रदर्शन गर्न नहुने तर्क गरिरहेकी छन् ।

उनी बलिउडभित्र मात्र होइन, सामाजिक र राजनीतिक विषयमा पनि कटाक्ष गरिरहेकी हुन्छिन् । खासगरी महिलामाथिको विभेद र पितृसत्तात्मक सोचलाई प्रहार गर्छिन् । ‘आक्रोशको बिम्ब’ मान्न थालिएको छ उनलाई । तर उनको यो रवैयालाई ‘कुण्ठा’ मान्ने पनि उत्तिकै छन् ।

‘चाहिनेभन्दा ज्यादा बोल्ने’ भन्दै उनको आलोचना गर्नेको पनि कमी छैन । बलिउडमा उनको आफ्नै समूह छैन । समकक्षी हिरोइनसँग राम्रो उठबस छैन । अझै पनि उनलाई पाखा लगाउन खोज्नेको जमात् ठूलै छ । तर, कङ्गनामा डर देखिँदैन । आफूलाई लागेको कुरा निर्धक्क बोल्छिन्, जोसँग पङ्गा लिनपरे पनि । उनी पटक्कै हच्किन्नन् । उनको अब आउने फिल्मको नामै छ, ‘पङ्गा’ । क्या संयोग/ कान्तिपुर

 

सक्दो सेयर गर्नुहोस्-

फेसबुकबाट तपाईको प्रतिक्रिया

प्रतिक्रिया