कालेबुङमा साङ्ग्रिला प्रकाशन संस्था एवं बुक क्याफे : लेखक अनि पाठकहरूका निम्ति साङ्ग्रिलाले राम्रो माहोल बनाउनसक्छ-हर्कबहादुर छेत्री

‘भरातीय नेपाली समाज ठूलो छ अनि हामीमाझ राम्रा-राम्रा लेखकहरू पनि छन् तर उनीहरूको कृतिको बजार व्यवस्थापन, प्रवर्धनमा भनेजस्तो काम भइरहेको छैन, साङ्ग्रिला बुक्स इण्डियाका सञ्चालक बोगटीले भने, ‘नेपाल अनि भारत दुवै देशका कृतिहरू प्रकाशित गरौँ अनि भारतका कृतिहरू नेपालमा अनि नेपालका कृतिहरू भारतका सबै नेपालीभाषीसम्म पुऱ्याउँ भन्ने हाम्रो उद्देश्य हो।’


कालेबुङ, 8 जुलाई


कालेबुङमा साङ्ग्रिला प्रकाशन संस्था एवं बुक क्याफेको औपचारिक उद्घाटन भएको छ। साङग्रिला प्रकाशन संस्था विगत 8 वर्षदेखि काठमाण्डौँमा स्थापित छ जसले आजसम्म धेरै पुस्तकहरू प्रकाशित गरिसकेको छ। यसै प्रकाशन संस्थाको भारत संस्करणका रूपमा ‘साङ्ग्रिला बुक्स इण्डिया’- विगत वर्ष नै सिलगढीमा ल्याइएको  हो, जसलाई अहिले कालेबुङमा सारिएको हो।

आइतबार एउटा कार्यक्रममाझ साङ्ग्रिला प्रकाशन संस्था एवं बुक क्याफेको उद्घाटन गरियो। कार्यक्रममा कालेबुङ महाविद्यालयका प्राचार्य डा. आरपी ढकाल, अधिवक्ता अनमोल प्रसाद, राजनीतिज्ञ एवं सर्जक डा. हर्कबहादुर छेत्री, सङ्गीतकार मधुसुदन लामा साथै यसवर्ष साहित्य अकादमी युवा पुरस्कार प्रापक कवि कर्ण विरह आदि विशेष रूपले उपस्थित थिए। कार्यक्रममा कवि लेखनाथ छेत्रीले कवि कर्ण विरहसित कवितीय अन्तर्क्रिया गरेका थिए।

यसबाहेक किन पढिँदैन किताब? विषयमा बहस सम्पन्न भएको थियो। डीबी मगरले मध्यस्थता गरेको बहसमा प्राचार्य डा. आरपी ढकाल, अधिवक्ता अनमोल प्रसाद, राजनीतिज्ञ एवं सर्जक डा. हर्कबहादुर छेत्रीले सहभागिता जनाएका थिए।

आजका पुस्तामा पुस्तकप्रति रूचि रहेको तर उनीहरूलाई कामलाग्ने अनि मनपर्ने पुस्तक एवं माहोलको अभाव रहेको कुरा बहसमा उठेको थियो। यसअवधि डा. हर्कबहादुर छेत्रीले लेखक अनि पाठकहरूका निम्ति साङ्ग्रिलाले राम्रो माहोल बनाउनसक्ने बताए।

यता कवि मनोज बोगटीले पनि साङ्ग्रिलाले पुस्तक प्रकाशनसितै पठन संस्कृतिको विकास अनि सामाजिक चेतनाको स्तरमा वृद्धि गर्ने उद्देश्यले प्रत्येक आइतबार सर्जक, कलाकार, राजनीतिज्ञ, सामाजिक कार्यकर्ता आदिसित संवाद, विमर्श गरिने बताए।

‘भरातीय नेपाली समाज ठूलो छ अनि हामीमाझ राम्रा-राम्रा लेखकहरू पनि छन् तर उनीहरूको कृतिको बजार व्यवस्थापन, प्रवर्धनमा भनेजस्तो काम भइरहेको छैन, साङ्ग्रिला बुक्स इण्डियाका सञ्चालक बोगटीले भने, ‘नेपाल अनि भारत दुवै देशका कृतिहरू प्रकाशित गरौँ अनि भारतका कृतिहरू नेपालमा अनि नेपालका कृतिहरू भारतका सबै नेपालीभाषीसम्म पुऱ्याउँ भन्ने हाम्रो उद्देश्य हो।’

यदि पुस्तकको सही बजार व्यवस्थापन गर्नसके लेखक पनि बाँच्नसक्ने भन्दै उनले लेखकलाई पनि राम्रो रोयल्टी उपलब्ध गराउन सकिने बताए।

यसबाहेक नेपाली भाषा अनि नेपाली पठन संस्कृतिलाई विकसित गर्न साङ्ग्रिलाले विद्यार्थी अनि युवा क्लब खोल्ने जहाँ सदस्यता लिएपछि उनीहरूले सबै प्रकारका पुस्तकहरू पढ्नसक्ने व्यवस्था गरिने पनि बोगटीले बताएका छन्।

उमेश परियारद्वारा सञ्चालित कार्यक्रममा कवि सुधिर छेत्री, रवि रोदन, राकेश क्रान्तिकारी, विशाल नाल्बो आदिले कवि वाचन गरेका थिए। गायक देवाशिष मोथेले टिस्टा नदीमाथि तयार गरेको गीत गाएर सुनाएका थिए। कार्यक्रममा विभिन्न व्यक्तिविशेष एवं सर्जकहरूको उपस्थिति थियो।

सक्दो सेयर गर्नुहोस्-

फेसबुकबाट तपाईको प्रतिक्रिया

प्रतिक्रिया