अब संसदीय पुस्तकालयमा नेपाली किताब : सांसद विष्टले बुझाए चारसय किताबको सूची

विज्ञापन

‘साहित्य एक यस्तो सांस्कृतिक धागो हो जसले समुदाय, धर्म र राष्ट्रलाई एकसूत्रमा बाँध्दछ। भाषा र साहित्यले हाम्रा युवाहरूलाई उनीहरूका जरासँग जोड़दछ, र हाम्रो भाषाको संरक्षण निम्ति हामीले हाम्रो साहित्य र संस्कृतिको संरक्षण गर्नु पर्दछ,’ विष्टले भनेका छन्, ‘जरा बल्लिया हुन्छन् भने हाम्रो समुदाय र देश स्वाभाविक रूपले बलियो बन्नेछ। त्यसैले, मलाई यो सूची बनाउनमा मद्दत गर्नुभएको सबै अग्रजहरूलाई म धन्यवाद टक्र्याउँदछु।’


कालेबुङ, 1 सेप्टेम्बर


सांसद राजु विष्टले संसदीय पुस्तकालयमा नेपाली पुस्तकहरू राख्ने पहल गरेका छन्। उनले साहित्यकार एवं विद्वानहरूसितको सहकार्यमा दार्जिलिङलगायत उत्तरपूर्वीय क्षेत्र र त्यहाँका जनतालाई प्रतिनिधित्व गर्ने चार सय किताबहरूको सूची बनाएका छन्। सोही सूची आज उनले सदनका स्पिकर ओम विड्लालाई सुम्पिएका छन्। चारसयमध्ये 260 वटा पुस्तक नेपाली भाषामा लेखिएको पुस्तक र अन्य विभिन्न भाषामा क्षेत्र र जनतालाई प्रतिनिधित्व गर्ने विषय रहेका पुस्तक रहेको बताइएको छ।

‘मैले स्पीकर समक्ष दार्जीलिङ्ग पहाड़, तराई, र डुवर्स, सिक्किम तथा बाँकी उत्तरपूर्व क्षेत्रका साहित्यिक कृतिहरूलाई संसदीय पुस्तकालयमा राख्ने र सङ्ग्रहित गर्ने अनुरोध गरेको छु,’ विष्टले जनाएका छन्।

विष्टले बताएअनुसार  राष्ट्रको ऐतिहासिक एवं वर्तमान अभिलेखहरूको भण्डारको रूपमा संसदीय पुस्तकालय ज्ञान र जानकारीहरूको एउटा ढुकुटी हो। यसबाट भारतका नागरिकहरूले मात्रै नभएर, अन्तर्राष्ट्रिय विद्वानहरूले समेत लाभ उठाउँछन्।  

‘तर, दुःखको कुरा के छ भने हाम्रो क्षेत्रको समाज, इतिहास, साहित्य, संस्कृति तथा परम्पराको महत्त्वलाई राष्ट्रव्यापी रूपमा राम्ररी बुझिएको छैन। जागरूकताको यो कमीले हाम्रो क्षेत्रलाई अवसरहरूबाट वञ्चित गरेको छ अनि लामो समयदेखि हाम्रो जनता र संस्कृतिको विविधताले राष्ट्रीय परिदृश्यमा उपयुक्त चिह्नारी पाइरहेका छैनन्,’ विष्टले भनेका छन्।

विष्टले राष्ट्रमा उपयुक्त चिह्नारीको अभावले दार्जीलिङ पहाड़, तराई, र डुवर्स क्षेत्र पर्यटन स्थल तथा आफ्नो चिया उद्योगको लोकप्रियताको बावजूद विकास, शिक्षा, र आर्थिक विकासको हिसाबले राष्ट्रको बाँकी हिस्साको तुलनामा अझपनि पिछड़िएको समेत जनाएका छन्।

‘मैले माननीय स्पीकरज्यूलाई, नेपाली भाषा भारतभरि छरिएर बसेका १.५ करोड भन्दा बढ़ी भारतीय गोर्खा नागरिकहरूको भाषा, अनि भारतको संविधानको आठौँ अनुसूचीमा अन्तर्भुक्त भारतका २२ भाषाहरूमध्ये एक हुँदाहुँदै पनि, नेपाली साहित्य एवं संस्कृतिसम्बन्धी किताबहरूको संसदीय पुस्तकालयमा यथोचित प्रतिनिधित्व नभएको अवस्थाबारे जानकारी समेत दिएको छु,’ उनले भनेका छन्।

किताबहरू र साहित्य, बौद्धिक आदान-प्रदान एवं परस्पर समझदारी विकसित गर्ने र देशका नागरिकहरूमाझ हाम्रो राष्ट्रको समृद्ध संस्कृतिबारे जागरूकता फैलाउने महत्त्वपूर्ण माध्यम भएका हुँदा आफूले संसदीय पुस्तकालयमा राख्नका लागि दार्जीलिङ पहाड़, तराई, र डुवर्स, सिक्किम तथा उत्तर पूर्व क्षेत्रका किताबहरूको सुझाव दिएको उनले जनाएका छन्।

‘साहित्य एक यस्तो सांस्कृतिक धागो हो जसले समुदाय, धर्म र राष्ट्रलाई एकसूत्रमा बाँध्दछ। भाषा र साहित्यले हाम्रा युवाहरूलाई उनीहरूका जरासँग जोड़दछ, र हाम्रो भाषाको संरक्षण निम्ति हामीले हाम्रो साहित्य र संस्कृतिको संरक्षण गर्नु पर्दछ,’ विष्टले भनेका छन्, ‘जरा बल्लिया हुन्छन् भने हाम्रो समुदाय र देश स्वाभाविक रूपले बलियो बन्नेछ। त्यसैले, मलाई यो सूची बनाउनमा मद्दत गर्नुभएको सबै अग्रजहरूलाई म धन्यवाद टक्र्याउँदछु।’

स्पीकर विड्लाले दार्जीलिङ, पहाड़, तराई र डुवर्स क्षेत्रका किताबहरूलाई अबेर नगरिकन संसदीय पुस्तकालयमा सामेल गर्न तुरुन्तै निर्देश जारी गर्ने आश्वासन दिएको विष्टले जनाएका छन्।

सक्दो सेयर गर्नुहोस्-

फेसबुकबाट तपाईको प्रतिक्रिया

प्रतिक्रिया